BLANCO ANUNCIA O NOVO CARTEL DE CINE PROGRAMADO EN LALÍN PARA O PRIMEIRO SEMESTRE

A concelleira de Cultura, Begoña Blanco, vén de anunciar “a nova programación de cine que haberá en Lalín nos vindeiros meses, froito da tan boa acollida que tivo no seu inicio, e que ocasionou un cheo total nas salas de Lalín como nunca antes. Estas proxeccións desenvolveranse no Salón Teatro”.

“O primeiro filme, titulado Canta 2, terá lugar o 5 de febreiro ás 18h. Este filme versa sobre Buster e os seus cantantes que conseguiron facer do teatro New Moon o sitio de moda local, pero o enxeñoso koala quere algo máis: estrear un innovador espectáculo no teatro Crystal Tower da glamurosa Redshore City. Pero sen contactos no mundo do espectáculo, Buster e os seus artistas, a angustiada nai porquiña Rosita a porco-espín roquera Ash, o honrado gorila Johnny, a tímida elefanta Meena e, como non, o provocador porcino Gunter, terán que coarse nos despachos da mundialmente famosa empresa Crystal Entertainment, dirixida por un implacable magnate, o lobo Jimmy Crystal”.

“O 26 de febreiro terase a filmografía Alcarrás ás 20h, unha película que tivo 11 nominacións aos Goya. Alcarrás é un pobo que destaca pola gran colleita de pexegos que conseguen os seus habitantes. Para a familia Solé, con todo, as cousas cambiaron este ano. Un día, os integrantes desta familia espértanse para descubrir que algúns tractores están a arrincar as súas árbores. Tras a partida do patriarca da familia, o acordo que tiña co antigo propietario da terra podería estar desactualizado. Ante esta ameaza, tanto os nenos como os adultos Solé reuniranse para cultivar os seus pexegos por última vez. O día 19 de marzo ás 20h, “terase a proxección do filme 10 de Marzo, un filme baseado nas loitas obreiras do naval ferrolán que se saldaron, o 10 de marzo de 1972, co asasinato dos traballadores Amador Rey e Daniel Néboa, abatidos polos disparos da policía franquista, ademais de numerosos feridos”, sinala a edil de Cultura.

Blanco tamén da a coñecer que “o 2 de abril ás 18h. terá lugar a proxección de Clifford, El gran perro rojo. Cando Emily Elizabeth coñece a un rescatador máxico de animais que lle regala un pequeno cachorro vermello, nunca se imaxinou que ao espertarse se atoparía cun sabuxo xigante de tres metros no seu pequeno apartamento de Nova York”. No mesmo mes de abril e xa cara finais de mes, o 18 ás 20h terá lugar En los Márgenes un filme no que se expón a conta atrás de tres personaxes con tres historias entrelazadas que tratan de manterse a frote e sobrevivir a 24 horas craves que poden cambiar para sempre o curso das súas vidas. O filme explora o efecto que unha situación de estrés económico ten sobre as relacións persoais e como o afecto e a solidariedade poden ser un motor para saír adiante”.

Finalmente no mes de maio atoparanse 2 películas. O 7 de maio ás 18h será Liga de Supermascotas “na que Krypto o Superperro e Superman son amigos inseparables que comparten os mesmos superpoderes e loitan xuntos contra o crime en Metrópoles. Cando Superman e o resto da liga da Xustiza son secuestrados, Krypto debe convencer a un variado grupo dun albergue, Ace o sabuxo, PB a porquiña barrigona, Merton a tartaruga e Chip o esquío, de dominar os seus novos poderes e axudalo a rescatar aos superheroes.

Para rematar o 21 de maio ás 20h terá lugar a proxección de As Bestas, un filme con 17 nominacións aos Goya que está baseado nunha parella francesa, Antoine e Olga que se instalaron hai tempo nunha aldea do interior de Galicia. Alí levan unha vida tranquila, aínda que a súa convivencia cos aldeáns non é tan idílica como desexarían. Un conflito cos seus veciños, os irmáns Anta, fará que a tensión creza na aldea ata alcanzar un punto de non retorno”.

Blanco recorda que “o aforo é gratuíto e está limitado a 340 butacas, ademais non está permitido levar comida”.